Nomear celas

Nomes permitidos

Os nomes no Calc poden conter letras, caracteres numéricos e o guión baixo. Os nomes deben comezar cunha letra ou co guión baixo.

Caracteres especiais permitidos:

• guión baixo (_)

Os nomes non poden ser os mesmos que as referencias das celas. Por exemplo, o nome A1 non é válido porque A1 é unha referencia de cela á cela superior esquerda.

Os nomes non poden comezar coas letrs C ou R seguidas dun número; tampouco se permiten os caracteres C e R sós. Vexa a función ENDEREZO para máis información.

Os nomes dos intervalos de celas non poden incluír espazos. Os espazos si están permitidos nos nomes das follas e dos documentos.

Nomear celas e fórmulas

Unha boa forma de facer que as referencias a celas e intervalos de celas nas fórmulas sexan lexíbeis é darlles nomes aos intervalos. Por exemplo, pode nomear o intervalo A1:B2 Inicio. Así pode escribir unha fórmula como «=SUMA(Inicio)». Mesmo após inserir ou eliminar filas ou columnas, o Collabora Office asigna correctamente os intervalos identificados polo nome. Os nomes dos intervalos non poden conter espazos.

Por exemplo, é moito máis doado ler unha fórmula para un imposto sobre vendas se se pode escribir «=Contía * Imposto» no canto de «=A5 * B12». Neste caso, a cela A5 chamaríase «Contía» e a cela B12 «Imposto».

Empregue a caixa de diálogo Definir nomes para definir nomes para as fórmulas ou partes das fórmulas que utilice con máis frecuencia. Para especificar os nomes dos intervalos,

1. Seleccione unha cela ou intervalo de celas e escolla Folla - Intervalos e expresións nomeados - Definir. Aparece a caixa de diálogo Definir nomes.

2. Escriba o nome da área seleccionada no campo Nome. Prema Engadir. O novo nome definido aparece na lista de embaixo. Prema Aceptar para pechar a caixa de diálogo.

Tamén pode darlle nome a outros intervalos de cela nesta caixa de diálogo introducindo o nome no campo e seleccionando despois as celas correspondentes.

Se escribe o nome nunha fórmula, así que comece a escribir os primeiros caracteres verá o nome enteiro como suxestión.

• Prema a tecla Intro para aceptar o nome suxerido.

• Se máis dun nome comeza cos mesmos caracteres pode examinar todos os nomes empregando as teclas + Tab e para atrás empregando as teclas Maiús + + Tab.